每工透早 天才拄拍昲光 阿却姨仔就趕快起來煮早頓 以早是煮予一陣囡仔食 這馬是煮予伊家己食 食飽閒閒 罔行罔散步 四界罔看當做若運動 行來到媽祖廟口 佮這陣姊妹仔伴 心內話提出來罔講 (演唱) 怹講前講後講過去 講東講西講現在 但是毋捌聽怹講未來 若是心頭掠袂定 就來講予媽祖聽 (唉)心內的話無人疼 無人通知影 歲頭食到遮 其實嘛無向啥（ǹg siánn） 祈求囝孫平安 身體勇健 (口白) 阿却姨仔三十五歲就來守寡 一陣囡仔遮大陣 一開喙就討欲愛食 彼時細漢的半暝發燒 趕緊欲注射 醫生講著愛趕緊蹛院 若無是會無性命 彼時怹兜是散到強欲予鬼仔掠 阿却姨仔煩惱到毋知欲按怎 佳哉 佳哉阿珠仔怹兜蓋有量 出來共怹鬥打紮 (演唱) 若無毋知欲按怎 啊毋知欲按怎 啊欲按怎 伊那講又閣那越頭 講咱遮的姊妹 實在予恁真勞力 幾若十年攏予恁鬥相共 恁攏是我的恩情人 伊那講又閣喙那笑 講實在可憐喔 咱哪會逐家攏仝款 日頭將欲沉落西 等一句歹勢一直攏等袂來 若想欲流目屎 無愛哭予別人知 吞落腹內 笑容展出來 啊~無啥物通掛礙 月娘斜西 日頭浮出來 (口白) 今仔日透早 天才拄拍昲光 阿却姨仔就趕緊起來打扮閣兼梳妝 伊厝前厝後 一遍來一遍去 看閣再看 巡閣再巡 伊講遮的一花一草 伊攏欲共伊認予真 記予明 (演唱) 行來到媽祖廟口 規陣姊妹仔攏咧等候 怹攏穿彼軀上新的老旗袍 怹講政府就有需要 今仔咱攏欲來搬走 來去予囝孫仔共咱有孝 上毋甘的就是幾十年的厝邊兜 心內的話無人疼 無人通知影 心頭掠袂定 就來講予媽祖聽 保庇咱此去攏好命 日頭將欲沉落西 等一句歹勢一直攏等袂來 若想欲流目屎 無愛哭予別人知 吞落肚內 笑容展出來 啊~無啥物通掛礙 月娘斜西 日頭浮出來 啊~無啥物通掛礙 月娘斜西 日頭浮出來