1929年 伊佇南京的莊跤出世
細漢的時定定捾著行李 流浪到幾個完全生份的城市
1949年 故鄉開滿紅色的花蕊
借問兵仔兄這馬欲去佗位 一隻船往基隆港一直開
戰亂 分離 命運創治
毋知影離開了後當時通轉去 越頭目睭一目聶就是三十年
啊 故鄉是淺淺的海水 較豪ㄏㄠˊ泅水嘛泅袂轉去
生活過一個閣一個生份的城市 尾仔住佇用南京號名的路頂
啊 故鄉是淺淺的海水 偌濟思念攏停佇港邊
滿山遍野的管芒花直直開 仝款的春天到秋天 一年過一年
1979年 對香港轉來幾張批信
內底有伊細漢學行的相片 尾仔孫仔度晬 伊恬恬哭規暝
1989年 綴著船隻對金門轉去
舊時的路佮親情已經袂認得 親愛的母親已經離開幾若年
細漢的記憶 敢若是頂世人的代誌
來來去去有歡喜嘛有傷悲 應無所住的青春值幾兩銀
阿 故鄉是淺淺的海水 彼個艱苦的時代漸漸過去
伊嘛佇南京的路頂湠葉生根 倒轉去已經無遐爾要緊
啊 故鄉是淺淺的海水 想欲走揣的所在到底佇佗位
一座島嶼解說伊的後半生 無風 無雨 抑無湧
2019年 故鄉已經是遙遠的代誌
陪伴伊 只有夕陽佮搖椅 搖啊搖 搖去伊的1929年
