悲．歡．離．合 生．死．病．老
這八字 拆開來 是過程
這八字 疊起來 是一生
誰咧寫字 誰咧唸詩
誰的八字 誰的生時
誰咧我的夢境講過去
毋知 伊佇佗位 佗位有伊
是運 是命 前世人的咒誓
是愛 是恨 予這世人心拖磨
我手中一條一條命運的線 一寸一寸痛
花當時開 月當時圓 問天無應聲
求上天來保庇誠懇拍拚的人
用圓滿為怹的人生號名
我相信一步一步用心來行 一工一工晟
春天花開 十五月圓 人就袂拆散
求神明愛看顧有緣有心的人
向望有一日 咱攏會凍
歡歡喜喜 佮幸福仝車
悲．歡．離．合 生．死．病．老
這八字 經過時 是風湧
這八字 行過後 是風景
