若準是 董事長來託夢
伊講 伊想欲駛 伊家己生產的彼台車
載厝裡的親人 紡起去草山挽芭樂
若準是 總舖師來託夢
伊會講 紅標的油 毋通用
食了傷身體
彼鼎 閣真歹洗
若準是 作家來託夢
伊會講 小說拍做電影 攏真歹看 結局 閣譀呱呱
若準是 船長來託夢
伊講 海的另外一爿 仝款攏是海 並無新大陸
伊就回頭 佮海豬仔走相逐
我問阿公 阿公 敢有西方極樂世界
阿公 講有 講遐 風景袂歹 毋過 伊頇顢拍牌
高手 閣有夠濟 後來…….
後來 亂鐘仔就喨矣 我去洗面 鑢喙齒
嘛袂記得 阿公 敢有變瘦 抑是變懸
我問阿媽 阿媽 敢有西方極樂世界 阿媽嘛講有
阿媽講 阿公 阿婆 亻因攏佇遐
佇遐咧 食飯 開講 閣唱歌
看冊 啉酒 閣去紲攤
你若有話 袂赴講
做過啥物代誌 予你感覺後悔
攏會當 等你睏去
去夢中 去夢中 去夢中 才寬寬仔講
