想著吐大氣，講著講歸暝，閣掀開往事的舊相片
細漢彼當時，古早的記持，總是愈想愈痛愈稀微
傳統的家庭，保守的當時，重男閣輕女，算來無稀奇
父母望後生，偏偏不如意，伊的頂面有四個阿姊
對招弟來弟，到引弟帶弟，換到伊，號名叫罔市
名雖然菜市，但是人蓋媠，人攏講伊是，萬丹的西施
罔市生媠面肉白，迷倒歸莊的少年家
偏偏罔市因老爸，管了真嚴閣歹性地
莫怪莊內的七仔虧，不時嘛唱歌共伊虧：
只能回味，只能回味，罔市最難追
時間佇咧過，親像風咧飛，愈大漢罔市愈美麗
愛錢的老爸，做主將伊嫁，可憐的婚姻像買賣
尪是有夠花，閣有歹大家，這款的日子，實在無好過
日子無好過，日子仝款過，目一睨囝已經生兩個
世事會輪迴，好歹會輪替，彼年因尪生意煞出問題
為著欲照顧，厝內大佮細，只好出賣伊的面底皮
罔市生媠面肉白，伊是出名的眾人迷
數想的人有夠多，雙手來撥攏撥袂退
想空想縫的人客，不時嘛唱歌共伊虧：
來來來，請跟我舉起杯，跟罔市 乾杯
各種的風聲，傳甲真歹聽，真緊就傳到因尪遐
有影亦無影，啥人攏講袂聽，因尪愈罵煞愈大聲
雙人的緣分，既然行到遮，不如切切咧較快活
罔市嘆一聲，目屎早就乾，管伊女人是什麼命
逐項攏無愛，只愛兩個囝，是做人老母的心
一旦若看破，心內無牽掛，轉去後頭過著新生活
伊是萬丹的查某囝，轉來萬丹賣紅豆仔餅
問伊日子過了按怎，伊是恬恬攏無出聲
越頭看伊彼兩個囝，唱一條歌予家己聽
紅豆仔滾爛爛，紅豆仔滾爛爛，怨嘆嘛無較縒
紅豆仔足韌命，風雨嘛攏毋驚，看破就無算啥
