列位朋友我總請 姓周定邦我的名 小弟蹛佇台南城 欲來唸歌予恁聽 歌仔是我來安排 好䆀請咱聽看覓 若䆀請恁就諒解 當做議量無干礙 欲編榮仔揣頭路 毋是小弟白造烏 心適日子較好渡 心情才會逐日舒 閒話到遮欲扯擺 來聽小弟落下頦 頭聽到尾你就知 予你歡喜笑咍咍 這陣景氣是真䆀 榮仔失業佇厝內 一日到暗揣東西 欲揣頭路趁錢財 榮仔今年四十五 頭家關店無頭路 一時失業變無步 可憐阿榮面烏烏 逐日報紙買規疊 瞋甲目睭欲膨疱 電話攑來四界敲 頭路揣無足食膠 厝裡頭嘴遮大群 榮仔心頭亂紛紛 頭路揣無怎食睏 想著目屎準飯吞 榮仔艱苦今莫講 這馬失業極不通 報紙逐日買規緟 瞋甲目睭欲發癀 這工報紙有記載 倩人兩士報出來 榮仔心情誠清彩 攢辦應徵合應該 榮仔來到才知影 這是政府的官廳 欲倩工人搬物件 攏總欲倩兩三名 這搭叫做清潔隊 應徵的人規大堆 挨挨????????那看戲 榮仔看甲面反青 為著厝裡的某囝 榮仔堅心拚甲贏 若無厝裡會吊鼎 懸山彎嶺嘛著行 這个考試真奇怪 考試官閣誠慢來 ????來一陣虎豹獅 講著佮????比看覓 頭關比看啥走 猙狌逐佇尻川後 有人驚甲強欲吼 有人棄權緊落跑 榮仔想來閣想去 計智想甲真四序 腳步沓沓來徙位 徙來落尾才著伊 榮仔頭關來通過 第二關是誠連回 雙手攬米兩大袋 去走五千才閣回 榮仔頭殼真正好 米袋共伊割兩刀 沿路走閣沿路遨 五千走煞米拍無 紲落這關無仝款 正正就是第三關 榮仔看甲撟閣漩 若欲創治免遮全 這爿一个機器人 咧夯石碾頂下動 看伊咧夯誠輕鬆 無挕無哼面袂紅 閣來考官叫阿榮 來夯石碾通比並 時間攏總五分鐘 看啥力頭較才情 榮仔假仙腹肚疼 走去便所開砲城 偆的的人夯袂贏 榮仔尾等變頭名 榮仔頭路來揣好 袂輸干樂四界遨 逐日佇咧車糞埽 身軀不時烏趖趖 這項頭路真艱苦 逐時身軀臭ko͘ⁿ-ko͘ⁿ 透風落雨澹糊糊 月給總趁兩萬箍 榮仔想著好計智 暗時閣再排夜市 今是欲來賣啥乜 想來想去有主意 來來來緊來緊看 慢來你減看一半 列位朋友人客倌 英暗好戲欲來搬 這馬欲賣虼蚻藥 毋通看伊像樹葉 咧毒虼蚻效果謔 無買包恁會礙虐 這項藥材是祖傳 名聲蓋倒全台灣 若佮虼蚻有結冤 包領一盒拍通關 這項藥方真正好 管伊虼蚻公抑母 食了好食閣會討 毋信請恁看結果 這隻公的狗公腰 食了伊就起愛笑 閣會畏寒硞硞癜 想欲揣伴攬予燒 這馬母的予倚著 穢著病毒隨發燒 閣來兩隻著相招 ????去舂壁挵大石 紲落欲來賣齒膏 這款齒膏別位無 用了嘴齒較利刀 專門修理銅牙槽 烏仁目鏡真好看 毋是小弟咧臭彈 毋管天氣熱抑寒 掛咧日頭隨落山 欲賣這項叫關刀 會當刣雞兼刣鵝 破柴切菜削楊桃 咧割重巡人人褒 閣來這項菜瓜摖 專門幫助恁夫妻 若有想欲生後生 摖了定規生雙个 這个飯坩罕得看 轉過正爿出溫泉 轉過倒爿會洗碗 倒匼會當做算盤 這項神通袂輸仙 豬仔入去變煙腸 柴箍入去變牌匾 鐵枝入去變袚鍊 閣來這項人人愛 想欲好額閣發財 這支水觳買轉拜 一日三擺錢就來 閣來這項是雞胿 選舉來用袂克虧, 歕落選票提規堆 連鞭國會坐大位 若是想欲做總統 來買內褲上妥當 阮的內褲極好囊 頂懸標頭寫賊王 欲賣這項足厲害 鹿茸生佇耳孔內 咧浸藥酒人人愛 食了半暝硞硞哀 欲賣這頂假頭鬃 專門幫贊禿額人 有倩龜藝鬥相共 毋驚風吹來煏空 閣來這項是木屐 來買木屐好趁食 穿了包你會好額 無買你會做乞食 木屐毋通欲掔狗 苦毒猙狌是無???? 你若怨氣無地透 著提石頭掔賊頭 做官驚人石頭掔 來買網仔蓋利便 石頭掔著會過電 逐个電甲死殗殗 這項藥丸上稀罕 秘結來食蓋絚單 上等藥材攏袂散 逐日種芋照時間 這跤籠床蓋好空 專門解救歹運人 啥乜來炊攏會芳 一跤予你soe三冬 榮仔生做好嘴水 趁錢袂輸咧水 你若有去踅夜市 加減交關袂克虧 歌仔到遮欲扯擺 有緣機會才閣來 聽阮唸歌人清彩 年年月月大發財 歌仔到遮欲結束 小弟誠心來祝福 祝咱勇健閣快樂 日日平安大幸福