唱咱台灣一歌詩 歷史風雲四百年 恆春半島來起蒂 先人苦厄講透機 歌仔攏總編四款 頭項Lamey烏鬼蕃 第二Rover牢鵝鑾 美國起兵極擾亂 第三過來八瑤灣 日本存心佮咱冤 牡丹事件第四款 嘛是日本惹禍端 頭項事件先窮究 來講Lamey小琉球 為著結冤報冤仇 荷蘭刣人極夭壽 一六二一天熇熇 荷蘭大船金獅號 搢風拋錠Lamey島 天公做代無奈何 船長心肝悶帶憂 無水通食命會休 派人捾水通解救 號令起水小琉球 船長派人欲捾水 Lamey的人有營為 看????生張像土匪 攢辦家私欲共???? 捾水的人猶毋知 毋知有人欲來刣 半路搪著今著害 性命佇人指甲眉 捾水的人齊齊死 這款冤仇較大天 荷蘭船長極受氣 拍算報仇攢家私 一六三三彼一冬 起兵欲刣Lamey人 荷蘭計智想穩當 路尾嘛是無采工 一六三六閣起兵 荷蘭報仇攢無停 這改攢砲佮攢銃 欲予Lamey來開框 四月二六彼一工 荷蘭起兵那地動 規粒島嶼搜迵迵 四界欲刣Lamey人 Lamey的人著青驚 心肝親像火咧燃 窸倏去覕較有影 若無定規會無命 攏總覕佇石洞內 向望神明鬥催排 阮若平安才來拜 荷蘭兵仔毋通來 荷蘭起兵今來到 來到石洞的外頭 石洞攏總三个口 眾人參詳欲皆剿 兩个洞孔窒起來 另外一个閣安排 塗炭硫磺攢規載 洞口共燃薰入內 臭煙激甲哀哀苦 Lamey的人想無步 拜託荷蘭放生路 黃金白銀做恁???? 荷蘭毋信Lamey人 Lamey閣再覕洞孔 雙爿朝對誠十工 激死Lamey數百人 Lamey夆刣心肝凝 走來偷刣荷蘭兵 荷蘭長官歹衝衝 號令規島總剿清 規粒島嶼扳透透 Lamey的人極哭喉 大人囡仔齊掠到 逐个心肝亂操操 予人掠來到大員 失去自由足操煩 日頭若暗哭哀怨 Lamey才無烏鬼蕃 Lamey到遮欲扯擺 換講別項予恁知 美國大船的故代 請聽小弟來安排 時間親像風捒箭 一八六七三月天 美國大船出代誌 三月初九彼當時 所在恆春的半島 美國大船Rover號 屏東外海出差錯 拄大風雨命險無 大船浮漂人加陰 靠礁牢佇海蜇岩 若無起水真危險 心肝袂輸咧坐針 大船長官緊號令 換駛畝喥通起程 一目????久到墾丁 欲揣物件通食用 墾丁向時蹛排灣 毋捌看過紅毛蕃 敢是起水欲來亂 龜仔甪人起操煩 拍算出草大捙拚 龜仔甪人心扞定 家私攢好就起行 美國船員齊無命 美國船員攏齊死 廈門領事得知機 欲 佮清國來論理 清國官員毋插伊 清國官員污汝駛 美國領事就安排 海軍大船隨拍派 欲討身屍墾丁來 身屍毋予????提倒 龜仔甪人毋講和 美國起兵動干戈 事件觸纏有通遨 美國戰船派到位 拍輸排灣足落衰 死傷著痧一大堆 窸倏落跑緊離開 美國領事誠毋願 換派砲船到台灣 逼????清國就介管 閣欲壓霸咱排灣 滿清部隊真假痟 風聲欲來剿琅嶠 琅嶠頭人探明瞭 窸倏去揣滿清撨 共????美國會失禮 身屍予????提轉回 火山簽字閣訂契 鵝鑾燈樓起一个 美國大船的事件 到這坎站盡尾聲 後壁故事全有影 小弟安排予恁聽 時間親像風捒雲 一八七一的時陣 事件起譴佇日本 恆春半島亂紛紛 宮古派船去納貢 雄雄拄著青狂風 予風捒咧硞硞閬 尾手靠礁僫精光 靠礁牢佇八瑤灣 船員逐个心頭亂 無通食用極操煩 拍算起水入台灣 宮古船員齊起水 地頭生疏真掛累 枵饑失頓蓋剋虧 無頭胡蠅僫營為 落南想欲揣活路 遇著排灣面齊烏 排灣出草有步數 宮古船員塗塗塗 五十幾个攏齊死 規船死甲賰十二 搪著貴人????????去 才轉琉球再安居 日本政府知這局 隨唱琉球做藩屬 清國講話無制約 無主番界在恁浞 日本聽了齊知影 拍算起兵台灣行 起兵三千六百名 社寮起水欲消骿 日本頭殼一止蟒 拜候琅嶠的頭人 抑共唐人講一迵 干焦欲刣牡丹人 日本部隊到石門 拍算牡丹欲滅庄 早起相刣到下昏 牡丹對削蓋加圇 兩爿相刣咧朝對 日本無步通營為 牡丹出草足媠氣 日本兵仔死規堆 日軍刣到虱母山 牡丹社人咧扞盤 日軍刣過防守線 牡丹社人死規山 牡丹社人無持防 頭人父囝身齊亡 牡丹社人無大貢 去予日本皆捻紅 日本斟酌想計謀 欲剿排灣出雄步 牡丹女奶按兩股 高士佛社設一路 兵分三路同齊到 三社部落欲總剿 日本刣人足老到 便看著人命無留 三社刣輸齊投降 日本收兵欲回帆 毋知天公無疼痛 日本兵仔死欲空 山內斗底濕氣重 蠓蟲毒蛇會仝共 痲拉痢仔蠓刣人 日本兵仔死空空 日本刣贏蓋囂俳 無欲退兵濫糝來 欲佔台灣通人知 干焦清國激啀啀 美國英國出聲楗 逼????日本緊退兵 清國才想欲相舂 日本毋願心肝凝 日本退兵今了離 兩國拍契來簽字 清國政府才要意 知影半島是好物 滿清窸倏欲來顧 恆春設縣頭一步 絚單縣城起一圈 人民安居日子舒 人民安居世傳世 台灣歷史摸知脈 全是先人的苦厄 堅心脫離殖民地 歌仔到遮盡尾聲 有請朋友甲弟兄 台灣歷史就知影 才袂苦厄綴咱行 歌仔到遮欲扯擺 台灣歷史今齊知 堅心拍拚才應該 囝孫出頭好將來