列位鄉親好朋友 阮是台南大目周 欲編歌仔順紲唱 望恁聽了心清休 這部台灣的地名 閣有相觸拚輸贏 唱了袂䆀若有影 噗仔聲才催予行 歌仔一葩總四句 兩句地名新交舊 後壁兩句咧拚注 翁某相觸怙嘴誅 台灣地名先起譴 菱角出名佇官田 阮翁人叫貧惰仙 欲食毋趁極了然 講我貧惰極無譜 舊年夆倩去擔塗 有啦 轉來聽你喝艱苦 規冬拄去做一晡 仁德舊名叫土庫 滿州古早蠓捽埔 娶你這个真苦楚 荏懶又閣極大箍 大箍彼是你仝摃 荏懶刁工共你創 這層無愛佮你講 閣講欲共你捻紅 白河古早店仔口 水上號做水窟頭 嫁你做某想欲吼 瘦枝落葉那老猴 老猴老猴罔老猴 挽仙桃我上蓋???? 老猴老猴不死鬼 一雙手閣真匪類 腹肚一粒那水櫃 胸坎袂輸那樓梯 曷好！你共我記咧 記！記踮壁啦，記！ 東港較早叫東津 安平舊名一鯤鯓 荏懶大箍無打緊 也點胭脂展風神 連我點胭脂你抑嫌 新化古早大目降 佳里舊名是蕭礱 貧惰討趁毋振動 逐日閒閒挖鼻空 愈講愈無站節 景美較早叫筧尾 楠梓舊名楠仔溪 荏懶身軀毋捌洗 芳水????咧規鉎鍋 你嘛咧腫頷 一冬嘛才用一醃缸 大武舊名巴朗衛 公館古早隘寮下 講我身軀毋捌洗 人一個月洗一回 一月日洗一改 閣講遐大聲 滬尾這馬叫淡水 頭城較早叫頭圍 荏懶查某激愛媠 娶你做某足落衰 恒春古早叫琅嶠 旗山號做蕃薯寮 貧惰又閣興跋筊 跋輸轉來摔椅條 當時咧摔椅條 頂幫你跋甲三更半暝 轉來毋是咧摔椅條 唬！彼我是咧摃虼蚻 摃虼蚻用椅條，騙痟的 汐止叫做水返腳 台北舊名大咖臘 跋筊我是真有疱 欲予你食魚閣配肉 哎喲，有影無 按呢我毋著愛共你唚一个呢 來！來！遮！遮！ Kiss！Kiss！ 起你落屎症啦，Kiss 萬華古早叫艋舺 內壢號做崁仔腳 當時食魚閣配肉 聽你罷哹講bàng-kah 左鎮舊名叫拔馬 關西號做鹽菜棚 荏懶閣????激姿勢 頭毛逐時油沫沫 講我頭毛油沫沫 毋捌貨，匏仔當做菜瓜 王梨看做西瓜 人阮這是上時髦的????嗲嗲 都無咧紅龜粿閣????嗲嗲 講予你捌嘴鬚就拍結 竹山舊名林杞埔 萬丹古早興化廍 嫁你做某蓋苦楚 一圈腹肚那????壺 哼！嫌我一圈肚 彼攏是你仝創的閣 阿猴這馬叫屏東 大同舊名大龍峒 人講嘴闊食四方 人說堵大居財王 家治褒較袂臭火lo 彰化較早叫半線 瑞芳古名????仔瀨 不時目睭拍鐃鈸 綴你過日足著磨 山上舊名山仔頂 鼓山早前哈瑪星 看你日子足清閒 荏懶又閣激身穿 古早岡山阿公店 關仔嶺是火山岩 穿插無用你半針 按怎穿奅你抑嫌 恁兜服侍諍王 無愛佮你諍矣 民雄舊名是打貓 新港號做麻園寮 荏懶煮飯也袂曉 害阮逐日腹肚枵 唬！食甲遐大箍講 台西較早叫海口 清水舊名牛馬頭 逐日聽你咧哭喉 世間飼豬我上???? 雲林古早斗六門 田中叫做田中央 逐日看你翹尻川 舌閣吐甲長長長 五峰舊名叫大隘 屈尺這馬是烏來 看你有影戇大呆 連人運動也毋知 少著馬硩小擋咧 攏你咧共我供體 換我講你回 來啊！Who驚who， 看是欲死豬哥，抑是欲死豬母 三峽舊名三角湧 馬公叫做媽祖宮 看你食薰雙港熗 從早心肝烏一爿 內庄這馬叫大內 峨眉舊名是月眉 食薰偌好你敢知 熱人蠓仔毋敢來 我聽你咧落下頦 蘆洲舊名和尚洲 燕巢較早援巢右 不時佮人咧食酒 食甲串吐腸仔???? 這你就毋捌 衙門口是今崁頂 直加弄是叫安定 為著交陪王永慶 才著食酒來犧牲 交陪王永慶，鬼才欲信 那毋講交陪「川普」無較熗 鳥松頭是今太平 萬里橋今是萬榮 交陪川普有影熗 歹勢人阮都無閒 羅東舊名是老懂 台東以早叫寶桑 才調無夠照實講 毋通臭彈愛膨風 石門古早富貴角 大肚王國佇沙鹿 這項無愛佮你觸 荏懶查某蓋刺鑿 坪林古早坪林尾 五股叫做五股坑 相觸觸輸共人罵 嫁你這个䠡路皮 龍井舊名龍目井 大嵙崁是今大溪 失言共你會失禮 相觸毋通變冤家 石牌號做唭哩岸 宜蘭古早噶瑪蘭 你是堂堂男子漢 會共我會無簡單 隆田舊名番仔田 士林號做八芝蘭 共你會了我有按 欲閣佮你觸別層 復興古早叫角板 嘉義舊名諸羅山 欲觸佗項做你殘 觸輸毋通欲哀呻 和美較早勞里散 竹北舊名紅毛田 哀呻毋是男子漢 讓你先來才在範 新市古早叫新港 豐濱舊名是猫公 看你有影真撇送 毋通閣再挖鼻空 北斗舊名是寶斗 旗津古早叫旗後 咧挖鼻空我上???? 刁工挖予鼻血雙港流 高雄舊名是打狗 成功號做麻荖漏 刁工挖予鼻血流 毋捌看人遐癮頭 苗栗舊名是猫裡 玉井叫做噍吧哖 癮頭才會娶著你 阿西阿西足古錐 金山較早金包里 保安舊名車路墘 嫁你有影無捨施 嫁著一隻老螿蜍 松山古早叫錫口 永康號做埔羌頭 你是近視鏡仁厚 毋知螿蜍恁老猴 綠島舊名火燒島 三義號做三叉河 螿蜍都也蓋豬哥 看著烏貓癮趖趖 大稻埕叫奇武卒 鳳林舊名馬里勿 按呢號皂誠枉屈 無影代誌烏白捽 魚池舊名五城堡 玉里號做璞石閣 明明看你癮仙哥 流瀾流甲像溪河 太保古名溝尾庄 口湖叫做烏麻園 佮你相觸心會酸 毋才目屎準飯吞 鶯歌古早叫尖山 澎湖一搭叫望安 嫁你這个遮貧惰 想著目睭會出泉 新城號做哆囉滿 信義舊名木瓜村 阮是無愛佮你冤 事事讓你先過關 虎尾舊名五間厝 霧峰叫做阿罩霧 毋免你讓我袂輸 有啥功夫做你誅 蘆竹古早蘆竹厝 斗南號做他里霧 相觸輸贏到遮拄 換講鬥句來相輸 關山舊名阿里壠 高雄客庄叫美濃 欲比鬥句嘛無妨 一人兩句鬥神通 六龜舊名六龜里 龍潭號做靈潭陂 一人兩句我佮意 著提地名來營為 八里舊名八里坌 豐原較早葫蘆墩 我先起譴你綴阮 一人兩句免窮分 褒忠較早埔羌崙 草屯舊名草鞋墩 你先起鼓免溫吞 一人兩句著仝韻 九如舊名九塊厝 澎湖七美叫大嶼 桃園八德八塊厝 北門舊名北門嶼 三重較早三重埔 台中北區賴厝廍 后里舊名叫內埔 湖內古早是大湖 台灣古早台窩灣 甲仙號做傀儡關 台中西區叫公館 新莊舊名武溜灣 新埔號做吧哩嘓 頭屋舊名坎頭屋 東山較早哆囉嘓 萬里人攏叫瑪鋉 二水舊名二八水 樹林較早叫風櫃 布袋古早布袋嘴 義竹號做義竹圍 桃園舊名桃仔園 清水叫做臭水庄 內門古早羅漢門 南化以早是南庄 高樹較早大車路 富里舊名叫公埔 苗栗西湖是四湖 竹北號做豆仔埔 台中舊名叫鹽館 長濱號做加走灣 番仔挖今叫芳苑 楠西古早叫加拔 後壁號做後壁厝 蘭嶼舊名紅頭嶼 溪湖古早溪湖厝 東勢叫做東勢厝 大村較早叫大庄 大園號做大坵園 西螺舊名叫螺湯 三地門是山豬門 花壇舊名茄苳腳 水林號做水燦林 朴子較早朴仔腳 秀林叫做武士林 新竹舊名是竹塹 台東較早叫卑南 台南有名叫赤崁 西屯號做馬龍潭 光復古早馬大安 土城舊名媽祖田 泰安較早叫大安 萬巒早前是蠻蠻 彌陀以早瀰羅港 基隆舊名是雞籠 東石較早猴樹港 莿桐叫做莿桐巷 吉安較早叫吉野 神岡舊名是大社 柳營以早查某營 永靖舊名關帝廳 通宵早前是吞宵 鹿谷叫做羌仔寮 苓雅古早苓仔寮 鹿野舊名叫鹿寮 張路寮是今平鎮 鹽水舊名叫月津 紅瓦厝是今歸仁 屏東佳冬叫六根 台灣地名蓋趣味 有坑有崙抑有埤 有頭有尾有角勢 有頂有腳有竹圍 歌仔到遮欲扯擺 望恁聽歌大發財 身體勇健人清彩 平安幸福笑咍咍 列位鄉親咱總請 聽歌予恁好心情 咱若欲轉請順行 跋倒才唱我的名