列位貴君阮總請 姓周定邦我的名 小弟蹛佇台南城 欲來唸歌予恁聽 請咱朋友坐予倚 來聽小弟編新歌 閒話毋免喋規拖 這部新編竹仔歌 講著竹仔眾人知 全全種佇倚山內 咱若毋知欲瞭解 小弟編歌唱出來 竹仔路用有夠濟 通做䖙椅予人䖙 通做籠床炊甜粿 嘛通提來做薰吹 竹仔閣會生竹筍 竹筍通腸上齊勻 咱若秘結敨袂順 竹筍趕緊著來焄 竹仔會當做竹篙 披衫晾褲人人褒 竹仔聽好做搖笱 育囝晟孫有功勞 竹仔做箸蓋好勢 食飯毋免用手搣 較早無紙用屎桮 竹仔搭棚種菜瓜 竹仔路用誠十全 通做湯匙來????湯 嘛通提來做眠床 嚶嚶????????到天光 縛粽蓋濟用竹箬 娶某竹梳吊豬肉 竹箍起厝做柱腳 竹爿會當圍籬笆 竹仔路用蓋濟項 有人提來做箸籠 ????籃規跤漆紅紅 糞擔曲曲好擔重 飯匙添飯上四是 ????仔會當通貯物 做醮燈篙懸拄天 下笱聽好來掠魚 竹做掃梳通掃地 掃梳錦仔黏kit-le 涼筍厚絲甜閣脆 竹仔閣通做瓜笠 竹做米篩通篩米 齒戳聽好戳菜絲 竹做桌仔佮做椅 閣有囡仔????迌物 竹仔水銃會濺水 竹仔會當做樓梯 尖擔擔草袂費氣 竹仔嘛通做糞箕 竹仔路用閣蓋濟 竹仔田嬰天頂飛 竹仔干樂圓圓踅 竹棑聽好渡過溪 竹仔通做竹水管 竹橋過溪四界通 雞罩罩雞莫亂傱 竹仔起厝通做栱 米籃深底肩胛擔 菜籃淺底怙手捾 閣有一項叫竹盤 牛拖牛車用牛擔 桌罩崁菜蓋gió-toh 竹馬聽好四界遨 火鋏有人鋏糞埽 錢筒儉錢通????迌 竹仔會當做樂器 ????仔洞簫無稀奇 竹琴竹鼓有排比 欲牽豬哥歕噠笛 囡仔愛耍竹kit-le 竹管仔飯????嗲嗲 有人食飯用箸架 較早起火著火箠 椅苴竹做較袂燒 囡仔食飯用椅轎 竹仔牽線做魚釣 竹仔菜砧通切茄 欲捋頭毛竹柴梳 身軀咧癢愛抓耙 竹仔煎匙煎鹹粿 竹仔茶甌哈燒茶 竹攕聽好攕果子 竹尺做衫好家私 竹槍頭前尖微微 竹箭射著歸陰司 慶典歡喜放竹炮 暗時欲睏竹枕頭 竹耙耙草上蓋???? 泡茶著愛用茶漏 茶針泡茶蓋貴氣 竹銃這項????迌-物 Ni母車仔四界去 竹筆會當來寫字 竹劍劍道做武器 竹矸插花媠嚶嚶 竹弓射箭飛千里 籠仔著用竹篾編 粟仔串囥茄櫥內 茄櫥竹做報恁知 寒人火籠人人愛 挨米著愛塗礱來 竹仔路用百百款 出山著用靈頭幡 轎娶新娘竹著攢 佛寺講經徛幢幡 竹仔插花蓋雅氣 竹管毛筆牽大字 竹箬會當做葵扇 竹仔做冊通讀詩 竹仔通做雨傘骨 竹門竹窗用竹熨 竹筍煮湯甜粅粅 竹籤廟裡有咧出 現代起厝鷹仔架 竹篙欲架竹篙叉 通做廣弦的琴柄 竹刀刣著會流血 竹枴老人蓋切要 竹仔做枴袂使曲 竹仔樂器唱民謠 竹釘釘物釘真牢 一款提竹做尿管 竹簾遮日有天通 竹管浮筒蓋妥當 雞筅趕雞硞硞傱 一款竹做竹火管 內底迵空長長長 用灶起火著這物 歕甲火著嘴足酸 飼蜂著愛竹蜂箱 竹仔嘛通來做香 竹筅竹摖無仝樣 竹仔聽好做紙漿 竹䘥較早有人穿 竹屏厝內隔雙爿 厝頂抾水用竹筧 竹栓栓物極好用 竹仔路用足誠闊 提來編歌僫收煞 殘殘收煞毋免拖 才袂朋友恁著磨 歌仔到遮欲閘止 才知竹仔是好物 通食通用誠四是 這項是寶免憢疑 歌仔到遮欲結束 祝咱日日攏快樂 毋通嫌咱駛喙簇 祝咱平安大幸福 歌仔到遮欲扯擺 竹仔編歌予恁知 朋友聽了若袂䆀 噗仔聲才共摧予來